MANILA, Philippines – Winakasan ng National Bureau of Investigation (National Bureau of Investigation) ang ilegal na online game farming operations at inaresto ang limang Korean nationals sa magkahiwalay na operasyon sa Cavite at Pampanga.
Ayon sa NBI, isinagawa ng Special Action Unit ang operasyon noong Mayo 8 at Mayo 15 matapos makatanggap ng intelligence reports hinggil sa umano’y “farming” activities gamit ang online game na Lineage Classic, isang Korean multiplayer role-playing game na may in-game currency na “Adena.”
Ayon sa ahensya, ginagamit ang Adena sa pagbili ng in-game items at nagkaroon umano ito ng exchange value sa secondary markets kung saan ipinagpapalit ang accounts at digital assets sa totoong pera.
Sa isinagawang surveillance, nakumpirma ang mga lokasyon ng ilegal na aktibidad sa Imus City, Cavite at Angeles City, Pampanga kaya’t humiling ang NBI ng search, seizure, at examination of computer data warrants.
Sa Imus City, isinagawa ang operasyon sa isang gusali sa Barangay Buhay na Tubig kung saan nasamsam ang iba’t ibang computer na ginagamit sa paglaro. Natuklasan din na ang mga Pilipinong empleyado ay pinagtatrabaho ng hanggang 12 oras kada araw at may isang araw lamang na pahinga kada linggo, at binabayaran umano ng Korean supervisor.
Dahil dito, inaresto ang supervisor at dalawa pang Korean nationals. Kinasuhan sila sa ilalim ng Section 5(d) ng Republic Act (Republic Act 12010) at Section 28(e) ng Republic Act (Republic Act 8282).
Sa hiwalay na operasyon noong Mayo 15 sa Angeles City, Pampanga, nadakip ang dalawa pang Korean nationals at nasamsam ang karagdagang computer equipment na ginagamit umano sa ilegal na operasyon.
Kinasuhan din ang mga suspek sa ilalim ng Section 4(b)(2) ng Republic Act (Republic Act 10175) at Republic Act 12010. Mary Anne Sapico
