MANILA, Philippines – Inilunsad ng Department of Environment and Natural Resources (DENR) ang limang taong proyekto para mapangalagaan ang Philippine Rise, isang submarine volcanic plateau sa silangan ng Luzon sa Philippine Sea.
Ayon kay Environment Secretary Raphael Lotilla, layunin ng inisyatibo na magkaroon ng pangmatagalang proteksyon sa isang mahalagang offshore ecosystem na nagbibigay benepisyo hindi lang sa Pilipinas kundi pati sa buong mundo.
Ang proyekto, na tinawag na PRICELESS (Philippine Rise Integrated Conservation for Enduring Legacies through Ecosystem Support Services), ay pinapatupad ng DENR sa pamamagitan ng Biodiversity Management Bureau (BMB), kasama ang Conservation International at Partnerships in Environmental Management for the Seas of East Asia, at pinondohan ng Global Environment Facility.
Nakatuon ito sa pagpapabuti ng pamamahala, koordinasyon ng ahensya, pagpapatupad ng batas, paglaban sa ilegal na pangingisda, at pagtataguyod ng sustainable na paggamit ng yaman ng dagat para sa mga karatig-komunidad.
Sa ilalim ng Presidential Proclamation No. 489 (2018), 434,517 hectares ng Philippine Rise ang itinakda bilang Philippine Rise Marine Resource Reserve, kasama ang 49,684-hectare Strict Protection Zone at 352,390-hectare Multiple Use Zone na pinamamahalaan ng DENR at Bureau of Fisheries and Aquatic Resources (BFAR). RNT/MND
