MANILA, Philippines – Arestado ang isang 24-anyos na lalaki na umano’y gumahasa sa isang 52-anyos na ginang na may kapansanan sa Valenzuela City, sabi ng pulisya.
Sinabi ni PCapt. Joan De Leon, punong public information officer ng Valenzuela City Police, nahuli ang suspek noong Biyernes, Setyembre 6, matapos mahuli sa akto ng mga rumespondeng opisyal ng barangay.
Ang biktima, aniya, ay may kapansanan sa pag-iisip at intelektwal.
“Nahihirapan na siyang tumayo. Lagi na siyang nakahiga or nakaupo sa wheelchair. At isa pa ay hindi na siya makapagsalita,” ani De Leon.
Ayon sa pulisya, inalerto ang mga barangay officer ng isang concerned neighbor na nakakita ng suspek na pumasok sa bahay ng biktima matapos ang apat na pagtatangka.
Isang grupo ng mga barangay officer ang rumesponde sa pinangyarihan, kasama ang kapitbahay na nanawagan ng kanilang aksyon.
“Noong kanila nang buksan ang pinto ay doon na nila naaktuhan itong suspek, nakapatong pa mismo doon sa biktima. Wala siyang saplot, ganoon din iyong biktima,” dagdag pa ni De Leon base umano sa testimonya ng saksi.
Ayon sa Valenzuela City Women and Children’s Protection Desk, sumailalim sa “medico-legal examination” sa Camp Crame ang biktima na nagpatunay na ginahasa siya.
Nakakulong ngayon ang suspek sa custodial facility ng Valenzuela City Police. RNT
