VINHEDO, Brazil (AP)- Bumulusok ang isang passenger plane sa isang residential community sa Sao Paulo state sa Brazil nitong Biyernes, kung saan patay ang 61 indibidwal na sakay nito, batay sa mga opisyal at sa airline.
Hindi sinabi ng mga opisyal kung may nasawi sa mga residente ng lugar na pinagbagsakan ng eroplano sa lungsod ng Vinhedo, halos 80 kilometro (50 milya) northwest ng metropolis ng Sao Paulo. Subalit, sinabi ng mga saksi na walang nabiktimang lokal na residente.
Inihayag ng airline na Voepass na ang eroplano nito, isang ATR 72 twin-engine turboprop, ay patungo sa international airport ng Sao Paulo na Guarulhos sakay ang 57 pasahero at apat na crew members nang bumulusok sa Vinhedo. Nagbigay ito ng flight manifest kung saan nakasaad ang pangalan ng mga pasahero subalit hindi ang kanilang nasyonalidad. Batay sa naunang pahayag, mayroong 58 pasahero.
“The company regrets to inform that all 61 people on board flight 2283 died at the site,” pahayag ng Voepass. “At this time, Voepass is prioritizing provision of unrestricted assistance to the victims’ families and effectively collaborating with authorities to determine the causes of the accident.”
Idineklara ni Brazil President Luiz Inácio Lula da Silva ang tatlong araw na pagluluksa.
Nagpadala na ng mga team ng mga bumbero at military police sa lokasyon. Kinumpirma ni Sao Paulo’s public security secretary Guilherme Derrite na walang natagpuang survivor. Narekober na umano ang black box ng eroplano. RNT/SA
