MANILA, Philippines – Magpapakalat ang Philippine National Police (PNP) ng nasa 6,000 pulis para magbigay ng seguridad sa Senado at mga kalapit na lugar sa impeachment trial ni Vice President Sara Duterte sa Lunes, Hulyo 6.
Ayon kay PNP public information chief Col. Allen Rae Co, naisapinal na ang comprehensive security plan para rito.
“A comprehensive security plan is already in place. Intelligence monitoring is ongoing to monitor any threats that there might be,” sinabi ni Co sa press conference nitong Biyernes, Hulyo 3.
Magsasagawa naman ng final coordinating conference ang PNP sa lahat ng mga unit nito para sa pinal na preparasyon.
Ani Co, hindi pa humihingi ang Senado ng karagdagang mga tauhan nang higit sa unang naitalaga ng Police Security and Protection Group.
Wala rin umanong natanggap na anumang impormasyon sa kahit anong grupo na magkakasa ng kilos-protesta malapit sa Senado sa pagsisimula ng impeachment proceedings.
“As of now, we are still on heightened alert. We will see by Monday if we will be upgrading our alert level,” dagdag ni Co. RNT/JGC
