Navotas, kinilala sa Green Legacy Awards ng DENR-NCR

Iginawad ng DENR-NCR ang Green Legacy Award sa Lungsod ng Navotas bilang pagkilala sa patuloy na kontribusyon at pakikipagtulungan ng lungsod sa pagsusulong ng mga programa sa pangangalaga sa kapaligiran at pagpapanumbalik ng likas na yaman.

Ang Green Legacy Awards ay isang taunang pagkilala na ibinibigay sa mga institusyon, komunidad, at sektor na napatunayang matibay na katuwang ng DENR-NCR sa pagtataguyod ng pangangalaga sa kapaligiran, pamamahala, at pagpapanumbalik ng mga likas na yaman sa buong Metro Manila.

Kinilala ng DENR-NCR ang Environment and Natural Resources Office ng Lungsod bilang isa sa mga inductees para sa patuloy na kontribusyon at pakikipagtulungan nito sa pagpapatupad ng mga programang pangkalikasan, partikular sa coastal at urban environmental management, solid waste management, at community engagement.

Nagpahayag ng pasasalamat si Mayor Tiangco sa pagkilala, na binibigyang-diin ang kahalagahan ng magkakasamang responsibilidad sa pangangalaga sa kapaligiran.

“We are grateful to DENR–NCR for honoring Navotas as a Green Legacy Award inductee. This recognition highlights the collective efforts of our city government and our communities in protecting the environment, particularly in coastal and urban management and solid waste initiatives,” ani Mayor Tiangco.

“We continue to urge all Navoteños to support these efforts by practicing proper waste segregation and disposing of waste at the proper time,” dagdag niya.

Patuloy na pinalalakas ng Pamahalaang Lungsod ng Navotas ang mga inisyatiba nito sa kapaligiran sa pamamagitan ng regular na mga aktibidad sa paglilinis ng baybayin at mga programang pangkalikasan na nakabatay sa komunidad.

Kabilang sa mga pangunahing proyekto nito ang pagtatatag ng Greenhouse at Materials Recovery Facility (MRF) sa Barangay Tanza 2, na sumusuporta sa wastong paghihiwalay ng basura, pag-recycle, at sustainable waste management.

—Jojo Rabulan