73 motorsiklo idinagdag ng NCRPO para pabilisin 911 response 

MANILA, Philippines – Nag-deploy ang National Capital Region Police Office (NCRPO) ng 73 karagdagang police motorcycles sa Metro Manila upang mapabilis ang pagtugon sa mga emergency call sa 911 hotline, lalo na sa mga lugar na madalas maipit sa trapiko.

Ayon sa NCRPO, makatutulong ang mga motorsiklo upang mas mabilis na makarating ang mga responder sa mga insidente kahit sa masisikip at congested na kalsada.

“Every second matters during an emergency. These additional motorcycles will give our responders greater mobility and allow them to reach people in distress as quickly as possible,” ayon kay NCRPO officer-in-charge Police Brig. Gen. Christopher Abrahano.

Sa 73 motorsiklo, 18 ang inilaan sa Manila, 18 sa Pasay, 14 sa Taguig, 13 sa Quezon City at 10 sa Pasig.

Idadagdag ang mga ito sa kasalukuyang police response vehicles at personnel na tumutugon sa mga emergency sa pamamagitan ng 911 hotline.

Inatasan din ni Abrahano ang mga police commander na ipuwesto ang motorcycle responders sa mga strategic area upang agad makaresponde sa mga tawag.

Hinimok naman ng NCRPO ang publiko na manatiling kalmado, magbigay ng tama at kumpletong impormasyon, at sundin ang instruksyon ng emergency responders kapag tumatawag sa 911. RNT