MANILA, Philippines – Nilinaw ng Senate impeachment court nitong Miyerkules na naiiba ang impeachment sa ordinaryong criminal prosecution, at inilarawan ang paglilitis bilang sui generis habang kinikilala na may katangian ito ng parehong administrative at criminal cases.
Ginawa ni presiding officer Francis “Chiz” Escudero ang paglilinaw bago dinggin ng korte ang oral arguments ng prosekusyon at depensa kaugnay ng voting threshold na i-a-apply sa pagdedesisyon sa impeachment case laban kay Vice President Sara Duterte.
Lumitaw ang isyu matapos magbanggaan sina House prosecutor Rep. Chel Diokno at defense lead counsel Sheila Sison kung maaari bang tawaging “respondent-accused” si Vice President Sara Duterte.
“Impeachment is primarily for the protection of the people as a body politic and not for the punishment of the offender,” ani Escudero sa kanyang ruling. Dagdag pa niya, ang impeachment ay pangunahing legal process na “like administrative cases, results in the removal of a public officer and, like criminal cases, requires evidentiary rules and due process.”
Nagsimula ang palitan nang hingin ni Diokno sa korte na linawin kung paano dapat tawagin si Duterte matapos marinig ang depensa na gumamit ng salitang “accused.” Iginiit ni Diokno na ang termino ay maaaring magbigay sa publiko ng impresyon na criminal ang paglilitis.
“This is clearly not a criminal case by any stretch. There is no criminal liability involved in this case,” ani Diokno. Hiniling niyang burahin ang nasabing pagtukoy sa record, at iginiit na ang kaso ay tumatalakay lamang sa fitness ni Duterte na manatili sa puwesto.
Tumutol naman si Sison at sinabing hindi lamang “accused” kundi “respondent-accused” ang tawag ng depensa kay Duterte. Iginiit din niya na ang pag-iwas sa termino ay hindi dapat magbigay ng impresyon na hindi na naa-apply ang constitutional protections sa impeachment proceedings.
“The defense or the counsel for the respondent did not refer to the respondent as accused by itself, but as respondent-accused,” ani Sison.
Sinuri ni Escudero ang transcript ng stenographic notes at kinumpirma ang pahayag ni Sison, kung saan nakatala ang pariralang “respondent-accused.” Kasunod nito, ibinasura niya ang mosyon ni Diokno na burahin ang pagtukoy.
Umabot din ang hindi pagkakaunawaan sa usapin ng presumption of innocence at sa quantum of proof na kinakailangan sa impeachment. Iginiit ni Diokno na bagama’t ang Bill of Rights ay naa-apply sa lahat ng paglilitis, ang presumption of innocence at proof beyond reasonable doubt ay mga pamantayang kaugnay ng criminal cases.
Sinabi naman ni Sison na hindi inaangkin ng depensa na proof beyond reasonable doubt ang pamantayang kailangan para sa conviction sa impeachment trial.
Tinapos ni Escudero ang tinawag niyang “intramurals” ng dalawang panig matapos ilabas ang ruling, upang makausad ang korte sa nakatakdang oral arguments nitong Miyerkules. Ernie Reyes
