BUKIDNON, Philippines — Patay na nang matagpuan ang isang 82-anyos na magsasaka sa loob ng kanyang bahay sa Barangay Anlugan, Cabanglasan, Bukidnon noong Martes.
Kinilala ang biktima na si Leon Bangot, na namumuhay mag-isa sa isang liblib na farmhouse. Ayon sa pulisya, nakagapos siya sa isang kahoy na sofa gamit ang sinturon at nagtamo ng 14 na saksak—13 sa dibdib at isa sa likod. Nagsisimula na ring mabulok ang kanyang bangkay nang matagpuan.
Huling nakita si Bangot na buhay noong Hulyo 16, ayon sa kanyang pamangkin.
Narekober ng mga imbestigador ang isang shotgun at bolo sa loob ng bahay na pinaniniwalaang pag-aari ng biktima.
Patuloy na iniimbestigahan ng pulisya ang motibo ng krimen at tinutukoy kung sino ang may sala. Tinitingnan din ang posibilidad na kakilala ng biktima ang suspek.
Inirekomenda ng SOCO ang pagsasagawa ng autopsy, ngunit tumanggi ang pamilya at piniling ilibing na lamang ang biktima. RNT/MDS
