MANILA, Philippines- Isinailalim sa contempt ng House Committee on Legislative Franchises si Kingdom of Jesus Christ (KOJC) church leader Pastor Apollo Quiboloy at ipinag-utos ang pag-aresto sa kanya ng House sergeant-at-arms.
Inaprubahan ito ni panel chairman Parañaque City 2nd district Rep. Gus Tambunting sa pagdinig nitong Martes, na hindi dinaluhan ni Quiboloy sa kabila ng subpoena.
Iminungkahi ni Vice Chairman Surigao del Sur 2nd district Rep. Johnny Pimentel na ikontemp si Quiboloy dahil umano sa kawalang-respeto ng huli sa panel batay sa hindi niya pagsipot.
Samantala, inilahad ni ABANG LINGKOD Party-list Rep. Joseph Stephen Paduano ang mosyon na arestuhin ng sergeant-at-arms ang kontrobersyal na pastor. Hiniling niya sa sergeant-at-arms na makipag-ugnayan sa Philippine National Police (PNP).
Wala namang tumutol dito.
“On a unanimous vote…Pastor Quiboloy is cited for contempt,” wika ni Tambuntig.
“The chair, hearing no objection, the motion…to direct the sergeant-at-arms to bring Pastor Quiboloy to the House premises is hereby approved,” patuloy niya.
Iniimbestigahan ng komite ang umano’y franchise violations ng television network SMNI, pormal na kilala bilang Swara Sug. Kabilang sa mga tinalakay ang kanselasyon ng prangkisa ng SMNI.
Si Quiboloy ay self-proclaimed “Appointed Son of God”. Siya rin ang spiritual adviser ni dating Pangulong Rodrigo Duterte. Meliza Maluntag
