MANILA, Philippines – Sa gitna ng lumalalang suliraning pang-ekonomiya na nagbabantang lalo pang magpahirap sa buhay ng mga Pilipino, hinimok ni Sen. Panfilo “Ping” M. Lacson nitong Miyerkules si Pangulong Ferdinand Marcos Jr. na masusing suriin ang kanyang economic team.
Ikinalungkot ni Lacson na patuloy na tumataas ang inflation at kahirapan sa gitna ng pagbagsak ng stocks, paghina ng piso, sobrang suplay ng mga ari-ariang panlupa at gusali, at paghina ng kumpiyansa ng mga mamumuhunan.
“ECONOMIC MALAISE: Stocks are sliding, the peso is losing its value, property is oversupplied, agriculture is in disarray, investors have stayed away, and inflation and poverty keep climbing. Mr. President, maybe it’s time to look hard at your economic team,” aniya sa X.
Noong Lunes, kapwa nagsara sa mas mababang antas ang lokal na stock market at ang piso habang nanatiling maingat ang mga mamumuhunan sa gitna ng mga pangamba sa inflation.
Lumago lamang ng 2.1 porsyento ang gross domestic product (GDP) ng Pilipinas sa ikatlong quarter ng 2026, mas mabagal kumpara sa 2.4 porsyentong paglago noong ikalawang quarter.
Sinabi ni Philippine Statistics Authority (PSA) chief Claire Dennis Mapa na ito ang pinakamabagal na paglago mula noong unang quarter ng 2021, noong kasagsagan ng Covid pandemic.
Ayon sa PSA, serbisyo lamang ang nagtala ng year-on-year growth na 3.7 porsyento noong ikatlong quarter. Bumaba naman ng 4.8 porsyento ang agrikultura, paggugubat at pangingisda, habang lumiit ng 0.003 porsyento ang industriya. Ernie Reyes