MANILA, Philippines- Hindi madaraanan ang apat na national roads, kabilang ang Kennon Road sa Baguio City, dahil sa baha o soil erosion dulot ng pinagsanib na epekto ng tropical storms at ng enhanced southwest monsoon (habagat), base sa Department of Public Works and Highways (DPWH) nitong Miyerkules.
Batay sa ulat mula sa DPWH Bureau of Maintenance, sinabi ni DPWH Secretary Manuel Bonoan na hanggang alas-6 ng umaga, ang mga apektadong kalsada ay matatagpuan sa Ifugao, Benguet, Isabela, at Antique.
Binanggit niya na isinara ang bahagi ng Kennon Road, sa K0223+020, Sitio Camp 2 Barangay Twin Peaks, Tuba, Benguet dahil sa road slip.
Sarado rin ang Banaue-Hungduan-Benguet Boundary Road sa Ap-Apid, Tinoc, Ifugao,dahil sa soil collapse.
Sa Isabela, hindi madaraanan ang Cabagan-Sta. Maria Overflow Bridge na kumokonekta sa Casibarag Norte, Cabagan at Mozzozin, Sta. Maria dahil sa mataas na lebel ng tubig.
Tatlong seksyon naman ng Iloilo-Antique Road ang sarado rin sa Barangay Igbucagay at Maalan, Hamtic, Antique dahil sa collapsed slope protection, road slip, at sinking/pavement depression.
Limitado naman ang access ng mga motorista sa kahabaan ng Mountain Province Boundary-Calanan-Pinukpuk-Abbut Road na kasalukuyang madaraanan ng light vehicles dahil sa sinking/settlement ng roadway.
Nagkabit na ng warning signs sa kahabaan ng mga apektadong road sections. RNT/SA
