MANILA, Philippines – KINUMPISKA ng mga tauhan ng Bureau of Customs (BOC) Port of Manila ang nasa P2 milyon halaga ng tinatayang nasa 25,000 kilo ng sariwang sibuyas na inangkat mula sa bansang Tsina.
Ayon sa BOC, sa isinagawang beripikasyon ay nakumpirma nila na ang kargamento ay kulang sa kinakailangang Sanitary and Phytosanitary Import Clearance (SPSIC) mula sa Department of Agriculture – Bureau of Plant Industry (DA-BPI), na humantong sa pagpapalabas ng Warrant of Seizure and Detention laban dito.
Nabatid na ang isinagawang inspeksyon ay pinangunahan ng BOC-POM kasama ang mga opisyal mula sa Department of Agriculture – Bureau of Plant Industry (DA-BPI), kabilang ang Plant Quarantine.
Pinuri naman ni Commissioner Bienvenido Y. Rubio ang pagsisikap ng BOC-POM na labanan ang agricultural smuggling.
“By rigorously enforcing import regulations, we not only shield our citizens from unsafe agricultural products but also enhance public trust and ensure the integrity of our nation’s food supply,” ani Rubio. JAY Reyes
