MANILA, Philippines – Naghain na ng kanyang certificate of candidacy (COC) si Senador Cynthia Villar nitong Lunes, Oktubre 7 para tumakbo bilang representative ng lone district ng Las Pinas City.
Si Villar ay sinamahan ng kanyang asawa na si dating Senate President Manny Villar, at mga anak na sina Senador Mark Villar at outgoing Las Piñas Representative at senatorial aspirant Camille Villar — na tatakbo sa ilalim ng Nacionalista Party (NP).
Noong Hulyo, sinabi ni Cynthia Villar na pinagpipilian niya kung tatakbo siya bilang congresswoman o bilang alkalde ng Las Pinas City.
Sa panayam matapos ang COC filing, sinabi nito na mas pinili niyang tumakbo sa Kongreso upang maipagpatuloy niya ang kanyang adbokasiya sa agrikultura at kalikasan.
“End term na ako sa Senate sa 2025 and I thought that in Congress, I can continue my advocacy sa agriculture and environment. And at the same time, I can help my constituents sa kanilang more livelihood projects, infrastructure, housing, and environmental protection especially flooding,” ani Villar.
Sa puna naman ng ilan na dapat ay tapusin na ang political dynasty at magkaroon naman ng bagong mukha, sinabi ni Villar na “Okay lang ‘yun. Hindi ko nga sila kilala eh.”
“Family kami, but it has been done [by] my father since 1963. Pinamana niya sa amin na mahalin ang Las Piñas. And I thought, it’s the memory of my father who really loved Las Piñas when he was alive,” ani Villar.
Si incumbent Las Piñas City Councilor Mark Anthony Santos ang isa sa mga makakatunggali ni Villar sa pwesto sa Kamara. RNT/JGC
