MANILA, Philippines- Ibinababa ng Department of Agriculture (DA) ang selling price ng bigas na alok nito sa ilalim ng farmer-to-consumer market initiative o Kadiwa stores, na sumasalamin sa bumababang presyo nito sa retail market.
Sa isang press conference sa Quezon City nitong Huwebes, sinabi ni DA Assistant Secretary and spokesperson Arnel de Mesa na sisimulan ng Agriculture Department ang pagbebenta sa Biyernes, Oktubre 11, ng P43 kada kilong well-milled rice sa ilalim ng Rice-for-All program nito.
Noong Agosto, inilunsad ng DA ang Rice-for-All Program kung saan nagbebenta ito ng P45 kada kilong bigas sa piling Kadiwa outlets.
Kasunod ito ng paglulunsad ng P29 Rice Program, kung saan nagbebenta ng subsidized rice sa presyong P29 kada kilo para lamang sa indigent at vulnerable sectors.
Samantala, available naman ang Rice-for-All program sa lahat ng consumers. RNT/SA
