MANILA, Philippines- Nagbabala ang Philippine Institute of Volcanology and Seismology (Phivolcs) nitong Martes hinggil sa posibleng lahar mula sa Bulkang Mayon sa paghagupit ni tropical storm “Kristine” (international name “Trami”) sa Bicol Region at sa Eastern Visayas.
Ayon sa Phivolcs, batay sa abiso ng Philippine Atmospheric Geophysical and Astronomical Services Administration (PAGASA), inaasahang makaaapekto si tropical storm Kristine sa mga rehiyong ito hanggang Miyerkules ng gabi.
Nagbabadyang magdulot ang malakas na ulan ng pag-agos ng volcanic sediment o lahar, mula sa Bulkang Mayon.
Hinikayat ng Phivolcs ang mga komunidad sa pre-determined lahar risk zones na maging alerto kabilang ang mga nasa Miisi, Binaan, Anoling, Quirangay, Maninila, Masarawag, Muladbucad, Nasisi, Mabinit, Matanag, Bonga, Buyuan, Basud, at Bulawan Channels sa Albay. Nakaamba ring makaapekto ang lahar sa mga lugar sa middle at lower slopes, at downstream areas.
Pinayuhan ng Phivolcs ang local government units at mga komunidad sa mga apektadong lugar mahigpit na bantayan ang tropical storm conditions at magpatupad ng preemptive measures. Santi Celario
