MANILA, Philippines – Pinangunahan ng Philippine Coast Guard (PCG) ang preemptive evacuation sa Sitio Pandan, Barangay Claudio Salgado, Sablayan, Occidental Mindoro nitong Miyerkules, Oktubre 23.
Kasunod ng alerto, ipinadala ang Deployable Response Group (DRG) mula CGSS Sablayan, kasama ang mga tauhan mula sa Bureau of Fire Protection (BFP) at MDRRMO, upang magsagawa ng evacuation ng mga pamilya na lubhang apektado sa mga lugar.
Sa Sitio Pandan, hinikayat ng team ang mga residente na lisanin ang kanilang bahay dahil sa mataas na panganib na dulot ng baha.
May kabuuang 15 pamilya, na binubuo ng 54 na indibidwal, ang ligtas na inilikas at dinala sa Pandan Evacuation Center, kung saan sila ay binigyan ng pansamantalang tirahan.
Ang pinagsamang operasyon ay matagumpay na natapos nang walang anumang karagdagang insidente.
Ang mga koponan ay nanatiling naka-standby sa Sablayan Emergency Operations Center para sa karagdagang pagsubaybay at tulong kung kinakailangan. Jocelyn Tabangcura-Domenden
