MANILA, Philippines- Mahigit 4,000 employment opportunities ang available sa special job fair para sa displaced Philippine Offshore Gaming Operators (POGO) workers na gaganapin sa lalawigan ng Laguna ngayong Biyernes.
Isasagawa ang special job fair sa Activity Center ng Ayala Pavilion Mall sa Biñan City.
“For the job fair, there will be 60 local employers with some 4,383 job vacancies,” pahayag ni Department of Labor and Employment (DOLE) Secretary Bienvenido Laguesma sa isang telephone interview nitong Huwebes.
Kabilang sa mga iaalok na trabaho ay production operators, cashier, sales clerk, warehouse crew at transporters.
Pinaalalahanan ng DOLE ang mga aplikante na magsuot ng casual business casual attire at magdala ng kanilang updated resume, ballpen, valid identification at iba pang pre-employment application requirements.
Nauna nang nagsagawa ang ahensya ng special POGO job fairs sa mga lungsod ng Parañaque, Pasay at Makati, na inorganisa partikular para sa mga manggagawang apektado ng pagsasara ng ganitong uri ng kompanya. RNT/SA
