MANILA, Philippines- Inireklamo ng mga environmentalist na sina Jhed Tamano at Jonila Castro sa Ombudsman ang umano’y pagkakadukot sa kanila ng militar sa Bataan nitong September 2023.
Isinampa nina Tamano at Castro ang mga reklamong paglabag sa Republic Act No. 10353 o ang Anti-Enforced or Involuntary Disappearance Act of 2012, Anti-Torture Act of 2009, paglabag sa Rights of Persons Arrested, Detained o under Custodial Investigation maging ang arbitrary detention at grave coercion sa ilalim ng Revised Penal Code.
Sa 22-pahinang reklamo nina Tamano at Castro, hiniling sa Ombudsman na isailalim sa preventive suspension without pay ang respondents habang isinasagawa ang imbestigasyon.
Nagsampa rin ang mga ito ng kasong administratibo dahil sa grave misconduct, grave abuse of authority, oppression at conduct prejudicial to the best interest of the service.
Hiniling din nina Tamano at Castro na masibak sa pwesto ang respondents na sina National Security Council Assistant Director General Jonathan Malaya, 70th Infantry Brigade Commander Lt. Col. Ronnel Dela Cruz, iba pang miyembro ng Philippine Army, National Task Force to End Local Communist Armed Conflict (NTF-ELCAC) at Philippine National Police.
Nais nilang managot ang mga respondent at mabasura ang mga walang basehang kaso laban sa kanila.
Iginiit ng environmentalists na isinailalim sila sa torture sa panahon na nasa kamay sila ng militar.
Sinabi nilang saklaw din ng Involuntary Disappearance Act ang nangyari sa kanila nang ilegal silang dinukot ng 70th Infantry Battalion sa pakikipagsabwatan sa NTF- ELCAC kung saan ikinulong sila ng 17 araw nang walang isinasampang kaso. Teresa Tavares
