P1.4-B ‘smuggled’ luxury cars nadiskubre ng BOC sa Pasay, P’que

TUMATAGINTING na P1.4 bilyong halaga ng mga imported na mamahaling sasakyan ang nadiskubre ng mga tauhan ng Bureau of Customs’ (BOC) Customs Intelligence and Investigation Service (CIIS) sa isinagawang operasyon sa magkahiwalay na bodega na matatagpuan sa Pasay at Parañaque City nitong Pebrero 13, 2025.

Ayon sa BOC, nakatanggap umano sila ng mga larawan ng mga di umano’y smuggled na mamahaling sasakyan na ibinebenta online kaya’t agad silang nagsagawa ng beripikasyon kung saan inalam din nila kung ang mga ito ay nagbayad ng kaukulang buwis.

Kinilala ng BOC ang mga nagbebenta na AC Che Gong Miao sa Pasay City at TopCar Specialist and Trading Corp. sa Parañaque City.

“This operation signals a new approach in the BOC’s operational strategies in going after smugglers and ensuring collection of rightful revenues due the government. It sends a message to all importers who think they’re already safe after their products have entered Philippine territory thru illegal forms and means. We want them to know that we have eyes everywhere. We are not stopping, and we are not slowing down. We’re always one step ahead of them,” ani BOC Commissioner Bien Rubio.

Kinumpirma naman ni CIIS Director Verne Enciso na may nakitang mga luxury vehicle sa mga lokasyon nang dumating ang BOC-CIIS team sa AC Che Gong Miao at TopCar Specialist and Trading Inc. at ihatid ang mga Letters of Authority (LOAs) at Mission Orders (MOs) sa mga kinatawan.

“When we received the tip about these vehicles early this month, we immediately verified the information and processed the issuance of the appropriate orders to conduct the operation,” ani Enciso.

Ibinahagi ni Director Enciso na ang ilan sa mga tatak na natagpuan sa lokasyon ng AC Che Gong Miao sa Pasay City ay mga unit ng Ferrari LaFerrari, Lamborghini McLaren, Maserati, Rolls Royce, Mercedez Benz, Maybach, Range Rover, Bentley, Alphard, at Jeep Wrangler.

Habang sa TopCar Specialist and Trading Inc. sa Parañaque City naman ay natagpuan ng team ang Rolls-Royce Cullinan, Ferrari SF90 Stradale at Mansory, Mercedes-Benz V-Class, Maybach, at BMW.

Ang kabuuang tinantyang halaga ng mga sasakyang ito ay humigit-kumulang P1.4 bilyon, kahit na ang huling listahan ay ilalabas pagkatapos ng imbentaryo.

Nabatid na sinelyuhan ng BOC ang mga pinto ng bodega at nagtalaga ng mga tauhan upang ma-secure ang lugar.

Ang mga may-ari, lessee, lessor, okupante, kinatawan, o sinumang partido na responsable para sa mga bodega ay binigyan ng 15 araw mula sa pagtanggap ng mga LOA upang isumite ang mga kinakailangang dokumento na nagpapatunay na ang mga tungkulin at buwis ay binayaran nang tama.

Kapag napatunayang walang kaukulang dokumento, mahaharap sila sa mga kasong paglabag sa Sections 1400, 1401 in relation to Section 1113 of Republic Act 10863, o mas kilala bilang Customs Modernization and Tariff Act (CMTA). RNT