MANILA, Philippines – Tinalakay nina Pangulong Ferdinand Marcos Jr. at Lao People’s Democratic Republic Prime Minister Sonexay Siphandone ang patungkol sa kooperasyon ng dalawang bansa sa defense, ekonomiya, at edukasyon.
Nagkaroon ng bilateral meeting ang dalawang lider sa sidelines ng 46th ASEAN Summit and Related Summits sa Malaysia, ayon kay Palace Press Officer Claire Castro.
Pinag-usapan ng dalawang bansa ang kontribusyon ng Overseas Filipino Workers (OFWs) sa Lao PDR, partikular sa larangan ng architecture at language training.
”Sa kanilang pananaw ay naging kaagapay nila ang mga Pilipino sa nation building. Nagpasalamat din ang bansang Laos for language trainings and scholarships for Laos ministries,” sinabi ni Palace Press Officer Undersecretary Atty. Claire Castro.
Tinalakay din ni Marcos sa Lao PDR ang posibleng negatibong epekto ng mga bagong teknolohiya.
Ani Castro, ”both leaders reaffirmed their commitments to further advance bilateral relations.”
Samantala, binanggit din niya na nagkaroon ng bilateral talk si Marcos kasama si Thailand Prime Minister Paetongtarn Shinawatra para pag-usapan ang patungkol sa trade at economic ties, agricultural cooperation, at paglaban sa transnational crimes.
Ito ang kauna-unahang miting ni Marcos sa lider ng Thailand. RNT/JGC
