P1.5B shabu nadiskubreng palutang-lutang sa dagat sa Zambales

MANILA, Philippines – Nadiskubre ng 10 mangingisda mula sa Bataan ang nasa 222.655 kilo ng methamphetamine hydrochloride (shabu) na lumulutang sa kanlurang bahagi ng dagat ng Masinloc sa Zambales noong Huwebes, Mayo 29.

Agad na itinurn-over ng mga ito ang illegal na droga sa mga awtoridad nitong Lunes, Hunyo 2 matapos makabalik mula sa kanilang fishing activity.

Tinatayang may street value na P1.5 bilyon ang naturang mga shabu na isinilid sa 10 sako na naglalaman ng 223 assorted vacuum-sealed transparent plastic packs.

Pinuri naman ni PDEA Regional Office 3 Chief ang aksyon ng mga mangingisda at ipinag-utos naman ang full investigation kung saan nanggaling ang mga illegal na droga.

Nagsanib-pwersa na ang mga awtoridad ng Bataan at Zambales kasama ang iba pang law enforcement agencies at local government units.

“The PDEA will continuously monitor all suspicious activities and remain steadfast in it’s commitment to eradicating drug smuggling in Central Luzon,” ayon sa PDEA Regional Director.

Ipinadala na sa PDEA ang hinihinalang illegal na droga para isailalim sa forensic examination at confirmation. RNT