MANILA, Philippines – Arestado ang dalawang hinihinalang gunrunner, kasabay ng pagkakakumpiska sa apat na armas sa entrapment operation sa Marawi City nitong Martes, Hulyo 8.
Kinilala ni Col. Caezar Cabuhat, Lanao del Sur police provincial director, ang mga suspek na sina Alino Maamor Topaan, 47, at Sadam Sarip Baguan, 38, kapwa residente ng Marawi City at kilalang dealer ng hindi lisensyadong mga armas.
Nakumpiska mula sa mga ito ang dalawang M14 rifles at dalawang M16 rifles, kasama ang ammunition.
Narekober din ng mga awtoridad ang marked money na ginamit sa buy-bust, sasakyan at iba’t ibang identification cards.
Ani Cabuhat, nagpanggap na buyer ang isang undercover agent.
“I commend the Marawi City police for their tireless efforts in encouraging wanted individuals to surrender peacefully and enforcing the law against those who refuse to cooperate,” sinabi pa ni Cabuhat. RNT/JGC
