MANILA, Philippines – Nanawagan si Interior and Local Government Secretary Jonvic Remulla sa mga local government units (LGUs) nitong Huwebes, Hulyo 17 na magpatupad ng mga ordinansang magpaparusa sa mga prank caller sa national emergency hotline o 911.
“Dapat may ordinance ang lahat ng LGUs na may monetary fine, jail time basta prank call,” saad ni Remulla.
Sinabi ng Department of the Interior and Local Government (DILG) na iniulat ng E911 National Office na noong 2024, malapit sa 12 milyong mga tawag ang natanggap at 60% ay nakilala bilang “fraudulent, hoax, or prank calls.”
Sa Presidential Decree 1727, sinabi ng DILG na ang mga indibidwal na nagpapakalat ng maling impormasyon ay maaaring makulong ng hanggang limang taon, multang hanggang P40,000, o pareho.
“May geofence at geo data kasi ang lahat ng tatawag. So kung tumawag ka at prank call ka, within five minutes, mahuhuli ka nila,” ayon kay Remulla.
Kabilang sa mga karagdagang feature ng pambansang emergency hotline system ay ang language-sensitive capabilities and push-to-talk over cellular technologies, na nagbibigay-daan sa real-time na koordinasyon sa mahigit 1,000 pulis sa buong bansa.
“Despite the technology we are using, we are doing very well. Pero sa bagong sistema natin, I think the PNP will have better response time, better quality of response,” aniya.
“Ngayon, 34 ang LGU na may sariling 911. Tapos may sarili ang Crame. Ang gagawin natin, magkakaroon tayo ng unified system sa buong Pilipinas,” dagdag niya.
Noong nakaraang Miyerkules, nasaksihan ni PNP chief General Nicolas Torre III ang simulation exercise ng isang 911 call, ngunit ang aktibidad ay naging totoong buhay na pagtugon ng pulisya sa isang emergency na sitwasyon. RNT/MND
