MANILA, Philippines – Umabot na sa 17 katao ang naaresto ng Philippine National Police Anti-Cybercrime Group (PNP-ACG) mula Disyembre 2024 hanggang Hulyo 31, 2025 dahil sa ilegal na online na pagbebenta ng text-blast machines at signal jammers.
Sa isang press briefing sa Camp Crame, ipinakita ni PNP-ACG Director Brig. Gen. Bernard Yang ang 11 GSM Modem Pool units na nakumpiska mula sa suspek na si “Kian,” 36, na naaresto sa Taguig City noong Hulyo 22 sa pamamagitan ng entrapment operation.
Ayon kay Kian, nakuha niya umano ang mga device bilang bahagi ng bundle ng computer mula sa dating seller ng POGO equipment.
Nahaharap si Kian sa kasong paglabag sa Philippine Radio Control Law at Cybercrime Prevention Act.
“This operation reflects our continued commitment to protecting the public from cybercriminals,” ani Yang, sabay panawagan sa publiko na ireport ang mga kahina-hinalang online transactions.
Sa kabuuan, nakumpiska na ng mga awtoridad ang 39 SMS blasters, 5 signal jammers, at 1 IMSI catcher na nagkakahalaga ng ₱1.1 milyon. Santi Celario
