MANILA, Philippines – May mga bagay na dapat isaalang-alang bago maisama ang artificial intelligence (AI) sa silid-aralan, ani House Basic Education and Culture Committee chairperson Roman Romulo.
Habang ang AI ay maaaring maging isang epektibong tool sa pag-aaral, sinabi ni Romulo na mahalaga para sa mga mag-aaral na bumuo ng kritikal na pag-iisip.
“May advantages siya, but before we implement it fully kailangan natin pag-aralan kung ano yung tamang level at kung sino yung mga estudyante na kailangan natin bigyan ng AI. Kasi mayroon ng mga pag-aaral, although preliminary po yun, may lumabas na pag-aaral I think from schools in Boston na sinasabi nga nila hindi naman wholesale ibigay natin yung AI sa lahat o yung technology,” aniya.
“Kasi maganda pa rin na nadedevelop yung learner o yung bata yung traditional way of learning. Nahahasa din papunta siyang critical thinking, kailangan talaga pinag-iisipan niya yung bawat bagay,” dagdag ni Romulo.
Ang pinakahuling pag-aaral ng Philippine Statistics Authority ay nagpakita na higit sa 1 sa 5 Filipino na may edad 10 hanggang 64 ay nahihirapang intindihin ang kanilang binabasa—sa kabila ng kakayahang magbasa, magsulat, at magcompute.
Sinabi ng National Statistician na si Claire Dennis Mapa na ang basic literacy rate — ang bahagi ng mga taong marunong magbasa, magsulat, at magcompute — ay 93.1%, ngunit 70.8% lang ang itinuturing na functionally literate, ibig sabihin ay nakakaintindi rin sila.
Sa kanyang ikaapat na State of the Nation Address, binigyang-diin ni Pangulong Ferdinand Marcos Jr. ang mga alalahanin tungkol sa sistema ng edukasyon, kabilang ang literacy.
“May value talaga ang AI. Pero hindi siya pwedeng wholesale for now, one size does not fit all. Kailangan natin ma-tailor fit yung pagintroduce ng technology, pag-introduce ng AI depending po sa sitwasyon para responsible din yung paggamit ng mga developments na ito,” saad ni Romulo.
“Pero naniniwala ako, the moment ma-full throttle at effective na ito na ginagawa ng DepEd natin, nakatutok na sa functional literacy, the computer technology will be used in the right way,” dagdag niya, na tumutukoy sa ARAL Program ng Department of Education na nag-aalok ng mga libreng tutorial at interbensyon sa mga mag-aaral na nahihirapan sa pagbabasa, mathematics, at science.
Sinabi naman ni Dr. Majah-Leah Ravago, direktor ng education center SEAMEO Innotech, na dapat tratuhin ang AI na parang isang assistant para gawing mas madali ang mga bagay para sa mga mag-aaral at guro.
“Baka hindi na puwede yung traditional na delivery of education, na delivery of learning. We have to think out[side] the box to make sure na yung AI, we use them as our collaborator, as our assistant. Assistant sa pagtuturo, ganon din sa learning, deepening and enhancing the learning,” aniya.
“Ang dami-daming trabaho ng mga guro. Kung meron siyang assistant, yung AI na tinatawag, kumbaga mababawasan yung mga panahon na ginugugol ng guro sa mga administratibong pagche-check, yung mga ganon, makakapag-focus sa mas lalong pag-deliver or pagbalangkas ng mga lesson plan,” dagdag pa niya. RNT/MND
