DPWH nais panagutin ni Jinggoy sa bumagsak na tulay sa Isabela

MANILA, Philippines – Kinwestyon ni Senate President Pro Tempore Jinggoy Estrada nitong Lunes, Agosto 4, ang kakulangan ng accountability sa hanay ng Department of Public Works and Highways (DPWH) anim na buwan matapos ang pagbagsak ng P1.2 bilyong Cabagan-Sta. Maria Bridge sa Isabela.

Sa kanyang privileged speech, iginiit ni Estrada na bukod sa truck driver, design consultant, at bridge contractor, dapat ding panagutin ang public officials na nangasiwa sa proyekto.

“Why is there no mention of disciplinary actions against these supervising officials whose approval and oversight, or lack thereof, enabled this tragedy? Mr. President, wala tayong nabalitaan na nasuspinding opisyal ng DPWH na may kinalaman sa proyektong ito. Wala rin tayong nabalitaang inimbestigahan sila upang panagutin,” sinabi ni Senate president pro tempore.

Hinimok ni Estrada ang DPWH na magkaroon ng full responsibility at accountability sa naturang isyu at hindi lamang ang paghabol sa private contractors kundi maging sa mga opisyal na sangkot sa pagpaplano, approval at implementasyon ng proyekto.

“Explain the approval process, identify the lapses in monitoring and enforcement, and most importantly, assure the public that this will never happen again—not through promises, but through concrete reforms in design, review, safety compliance, and project oversight,” anang senador.

Matatandaan na noong Pebrero 27 ay bumigay ang bahagi ng tulay na nag-uugnay sa bayan ng Cabagan at Santa Maria sa Isabela, dahilan para anim katao ang masaktan dito. RNT/JGC