MANILA, Philippines – Inamin ni House Committee on Appropriations Chairman Mikaela Suansing na magkakaroon ng konsultasyon sa mga miyembro ng House of Representatives kaugnay sa pagpopondo sa Ayuda para sa Kapos ang Kita Program (AKAP), ang assistance program para sa mga minimum-wage earners, matapos hindi na ito paglaanan ng pondo sa ilalim ng 2026 National Expenditure Program.
Aminado si Suansing na ang AKAP ay malaking tulong sa mga constituents ng mga mambabatas.
“I would have to confer with my colleagues in the House because this would have to be a collective decision, whether or not to add funding for AKAP for this budget cycle,” paliwanag ni Suansing.
“Personally, in recent years, nakita ko ‘yung naitulong ng AKAP sa aming mga constituencies, or sectors that were previously untapped by AICS,” dagdag pa nito.
Una nang sinabi ni Budget Secretary Amenah Pangandaman na walang AKAP funds sa P6.7-trillion proposed budget para sa 2026. Aniya, mayroon pang undisbursed AKAP allocations sa ilalim ng 2025 budget.
Ipinaliwanag ni Suansing na ang Kamara, bilang bahagi ng bicameral Congress kasama ang Senado, ay maaaring maghain ng amendments sa proposed budget subalit dapat lamang na nakaangkla ito sa programa ng administrasyon. Gail Mendoza
