MANILA, Philippines – Iniulat ng Department of Agriculture (DA) nitong Lunes na ang mga kaso ng African swine fever (ASF) ay bumababa kumpara sa parehong panahon noong 2024 sa kabila ng bahagyang pagtaas ngayong buwan.
Noong Agosto 7, ang mga barangay na apektado ng ASF ay tumaas sa 51 mula 28 noong Hulyo 11, ayon sa Bureau of Animal Industry (BAI).
“Karamihan kasi last year is August din. Ngayon nasa gitna tayo ng August, 51. Compare mo iyong figures same period last year, mas significantly lower ngayon kaysa last year,” ayon kay DA spokesperson Assistant Secretary Arnel de Mesa.
Noong 2024, naitala ng DA ang muling pagkabuhay ng ASF sa ikatlong quarter, na may mga unang kaso na umusbong sa Lobo, Lian, Rosario, Calatagan at Lipa City sa Batangas.
“Iyong mga areas na may tama ngayon, hindi iyon mga areas na tinamaan last year,” aniya.
Sinabi ni De Mesa na karamihan sa mga apektadong komunidad ay nasa Bohol.
Ang iba pang apektadong barangay ay nasa rehiyon ng Cordillera, Ilocos, Central Luzon, Calabarzon, Mimaropa at Eastern Visayas. RNT/MND
