PASAY CITY, Philippines – Nakumpiska sa isang shopping center sa Pasay City ang umano’y mga pekeng sapatos na nagkakahalaga ng P1.73 milyon, ayon sa Criminal Investigation and Detection Group (CIDG).
Tinarget ng raid ang anim na stall sa Cartimar Shopping Center noong Huwebes ng hapon, na naging dahilan ng pagka-aresto sa siyam na suspek, ayon sa CIDG.
“The nine arrested suspects were caught while trading and distributing alleged counterfeit and trademark-infringing assorted footwear,” paliwanag ng pulisya.
Hindi naman tinukoy ng CIDG ang mga suspek.
Ayon sa pulisya, kabuoang 738 pares ng sapatos ang nakumpiska ng mga awtoridad.
Kinasuhan ang mga naarestong suspek sa National Prosecution Service dahil sa umano’y paglabag sa Republic Act 8293 o Intellectual Property Code. RNT/MND
