MANILA, Philippines – Inaprubahan ni Senate President Francis “Chiz” Escudero ang pagpapalabas ng subpoena laban sa limang contractor at tatlong opisyal ng Department of Public Works and Highways (DPWH) para dumalo sa Blue Ribbon Committee hearing sa Setyembre 8 hinggil sa anomalya sa flood control projects.
Kabilang sa mga pinatatawag si Pacifico “Curlee” Discaya II, asawa ni Sarah Discaya at opisyal ng Alpha & Omega General Contractor, at dating Bulacan assistant engineer Brice Ericson Hernandez. Kasama rin sina Darcy Kimel Respicio, Sally Santos, Maritoni Melegrito, Edgardo Saggum, gayundin ang mga opisyal ng DPWH na sina Jaypee Mendoza at Juanito Mendoza.
Inutusan din ni Escudero ang Commission on Audit na magsumite ng fraud audit highlights at mga sagot ng mga respondent. Binigyang-diin niya na dapat walang itagong detalye sa imbestigasyon.
“Let the axe fall on all the personalities found guilty of scheming, conniving and carrying out fraudulent acts,” ani Escudero. RNT
