MANILA, Philippines – Ipinahayag ni Senate President Vicente “Tito” Sotto III nitong Lunes ng gabi na papalitan ni Senate President Pro Tempore Panfilo “Ping” Lacson si Sen. Rodante Marcoleta bilang chairman ng Senate Blue Ribbon Committee.
Ayon kay Sotto, hindi maaaring manatili si Marcoleta sa puwesto dahil “he is not a member of the majority. The Blue Ribbon is reserved for the majority.” Kumpirmado rin aniya na nagkasundo na ang mga senador sa pagpapalit.
Naganap ang pagbabago ilang oras matapos mahalal si Sotto bilang bagong Senate President kapalit ni Sen. Francis Escudero. Si Lacson, na pinuno rin ng Committee on Electoral Reforms, ay nauna nang nahalal bilang Senate President Pro Tempore kapalit ni Sen. Jinggoy Estrada.
Itinalaga rin si Sen. Juan Miguel “Migz” Zubiri bilang Senate Majority Leader, pumalit kay Sen. Joel Villanueva, habang mananatili si Sen. Sherwin Gatchalian bilang chairman ng Senate Committee on Finance.
Kamakailan, pinangunahan ni Marcoleta ang isang pagdinig kung saan iniuugnay ng mga kontratista ang ilang mambabatas at opisyal sa umano’y katiwalian sa mga flood control project. RNT
