MANILA, Philippines – Patuloy na nagsisikap ang Department of National Defense na gawing pormal ang kasunduan sa pakikipagtulungan sa pagtatanggol sa pagitan ng Pilipinas at South Africa.
Natugunan ang hakbang nang makipagpulong si Defense Secretary Gilberto Teodoro Jr. sa Minister of Defense at Military Veterans ng South Africa na si Angelina Motshekga, sa sideline ng Seoul Defense Dialogue (SDD) 2025 noong Lunes.
“The meeting highlighted ongoing efforts to formalize defense cooperation between the Philippines and South Africa through a Memorandum of Agreement on Cooperative Activities in the Field of Defense, the first such agreement between the Philippines and an African country,” saad ng DND sa isang pahayag.
Ipinaliwanag din ni Teodoro ang mga potensyal na larangan ng kooperasyon sa pagitan ng Pilipinas at South Africa, tulad ng military medicine and safety ng seafarers, habang ang parehong partido ay muling pinagtibay ang kanilang pangako sa pagsuporta sa internasyonal na kapayapaan at seguridad, at pagsusulong ng multilateral na kooperasyon.
Nakipagpulong kay Teodoro ang ministro ng pambansang depensa ng Seoul na si Ahn Gyu-Back upang talakayin ang pakikipagtulungan sa logistik, pagpapalitan ng teknolohiya, kooperasyon sa industriya ng depensa, sa ilalim ng balangkas ng 2015 PH-ROK Memorandum of Understanding on Cooperation in the Field of Defense.
Ipinaabot din ni Teodoro ang opisyal na imbitasyon kay Ahn na bumisita sa Pilipinas..
Ang patuloy na pag-unlad sa iminungkahing Status of Visiting Forces Agreement sa pagitan ng Maynila at Ottawa ay tinalakay nang makilala ni Teodoro ang Deputy Minister of Defense ng Canada na si Stefanie Beck.
Nakipagpulong din si Teodoro kay Secretary to the Minister for Civil Defense, Johan Berggren para tuklasin ang kooperasyon sa civil defense, crisis response, capacity building, defense education at training, pati na rin ang teknolohiya at mga umuusbong na domain ng seguridad, bilang pagtibay sa pagtatayo ng pakikipagtulungan ng Manila at Stockholm sa 2023 Memorandum of Understanding on Defense Materiel. RNT/MND
