MANILA, Philippines – Nananatiling tikom ang bibig ni Executive Secretary Lucas Bersamin sa mga magiging miyembro ng independent commission na itatatag upang mag-imbestiga sa mga umano’y anomalya sa flood control projects sa bansa.
Sa panayam sa Senado, tinanong si Bersamin kung tinanggap na ni Baguio City Mayor Benjamin Magalong ang imbitasyon na maging bahagi ng komisyon.
“I am not sure about that,” ayon sa opisyal.
Nang tanungin pa kung sino ang mga bubuo sa three-man body, sinabi ni Bersamin na:
“Not yet. We have to be quiet about that yet because the President has to give us the updates.”
Mismong si Magalong ang nagsabi na hindi pa siya nakakatanggap ng imbitasyon para lumahok sa komisyon.
Sa oras na maipakilala, ang independent body ay inaasahang agad na magsisimula ng imbestigasyon dahil “the President sees the urgency of doing many, many things all at once,” sinabi ni Bersamin.
Iginiit naman niya na maaari pa ring magpatuloy ng sariling imbestigasyon ang Kongreso kasabay ng hiwalay na imbestigasyon na isasagawa ng komisyon.
“That’s not a problem, because our independent commission if it ever comes out may just be about fact-finding only,” aniya.
“Now we all want all sectors of the Philippine society to contribute to the effort to find facts about these issues on flood control anomalies,” dagdag pa. RNT/JGC
