MANILA, Philippines – Humiling ng writ of amparo sa Pasay Regional Trial Court nitong Huwebes si dating Department of Public Works and Highways (DPWH) Bulacan 1st District Assistant Engineer Brice Hernandez dahil umano sa mga “serious active threats” laban sa kanyang buhay.
Ang writ of amparo ay isang proteksiyon na ibinibigay sa mga indibidwal na ang karapatan sa buhay, kalayaan, at seguridad ay nasa ilalim ng pagbabanta.
Inihain ni Atty. Ernest Levansa sa korte ang pansamantalang utos ng proteksyon gayundin ng mosyon na siya ay isaalang-alang para sa proteksyon ng saksi.
“After the revelations we have made during Congress, we can’t deny that there’s really a threat. And at the same time, Congress actually affirms this threat by refusing Brice Hernandez to be returned to the Senate. So this is not speculative, this is real,” saad ni Levansa.
Hiling pa ng kampo ni Hernandez na maibalik ang engineer sa custodial facility ng Camp Crame matapos magdesisyon ang Senado nitong Miyerkules na ikulong siya sa Pasay City Jail.
“The PNP Custodial facility is actually a better option. We don’t even understand why it has to be here in Pasay City Jail. In fact… There was never an instance that Pasay City Jail was even an option,” patuloy ni Levansa.
Dagdag pa rito, kinuwestiyon ng abogado kung paano napagdesisyunan ang paglipat kay Hernandez sa Pasay City Jail.
“The debate was with regard to whether the Senate should have custody, but what happened after the recess? We were suddenly moved to Pasay City Jail, then it was seconded. And then, that’s it, no one even objected. The motive, again, is highly suspect,” aniya.
Ang dating inhinyero ng DPWH ay nasa kustodiya ng Senado, at kalaunan ay inilipat sa pasilidad ng Camp Crame matapos sabihin sa House of Representatives na nangangamba siya para sa kanyang kaligtasan.
Sa pagdinig ng komite ng Kamara, sinabi niya na sina Senador Joel Villanueva at Jinggoy Estrada ay may kaugnayan sa mga maanomalyang proyekto sa pagbaha na iniimbestigahan.
Humarap si Hernandez sa Senado at sa House of Representatives dahil sa diumano’y pagkakasangkot niya sa mga “ghost projects,” na karamihan ay nasa kanyang distrito.
Si Hernandez ay na-cite in contempt sa Senado dahil sa pagtanggi sa umano’y pagkakaroon ng pekeng lisensya na ginagamit sa mga casino.
Sa parehong pagdinig, iginiit niya na ang kanyang “boss,” si dating DPWH Bulacan 1st District Assistant Regional Director Henry Alcantara, ang nagdala sa kanya sa mga casino at nag-utos sa iba pang tauhan ng DPWH na maghatid ng pera sa mga makikinabang sa mga proyekto.
Ibinunyag kamakailan ni Sen. Panfilo Lacson na si Hernandez at apat sa kanyang mga kasamahan mula sa distrito ay nakatransaksyon ng pataas na P1 bilyon sa mga casino batay sa mga talaan ng Philippine Amusement and Gaming Corp.
Sina Hernandez at Alcantara, kasama ang iba pang opisyal ng DPWH sa Bulacan District 1, ay tinanggal sa DPWH. RNT/MND
