INIULAT ng Commission on Audit (COA) na nakapaglabas na ito ng 1,985 Notice of Disallowance sa Department of Public Works and Highways (DPWH) sa nakalipas na isang dekada.
Ayon kay COA chairperson Gamaliel Cordoba, ang kabuuang halaga ng mga disallowance ay umabot sa Php 5.8 billion, habang nasa 8,294 ang Notice of Suspension na nagkakahalaga ng Php 303.68 billion, at 54 Notice of Discharge na aabot sa Php 8.8 million.
Ibinahagi rin ni chairperson Cordoba ang ulat ng Fraud Audit Team tungkol sa ilang flood control projects sa Bulacan na ipinagkatiwala sa Wawao Builders, St. Timothy Construction Corporation, at SYMS Construction Trading.
Natuklasan na ilan sa mga proyektong idineklarang “100 percent completed” sa papel ay hindi pa pala lubos na natatapos sa aktuwal, kagaya ng proyekto sa Barangay Frances sa Calumpit na halos kalahati pa lamang ang natatapos sa itinakdang haba ng istruktura.
Ang Notice of Disallowance ay isang opisyal na dokumento mula sa COA na nagsasaad na ang isang transaksyon ng pamahalaan ay hindi aprubado dahil ito ay labag sa batas, walang sapat na dokumento, o hindi tama ang paggasta.
Kapag na-issuehan ng Notice of Disallowance, maaaring managot ang mga opisyal at empleyado na responsable sa pag-apruba o paggastos.
Kabilang dito ang posibilidad na singilin sila para ibalik ang perang nagastos.
Habang ang Notice of Suspension naman ay pansamantalang pagtutol lamang at maaaring maayos kapag nakapagsumite ng sapat na ebidensiya o dokumento ang mga kinauukulang opisyal.
Kung hindi maipaliwanag o maayos ang disallowance, nagiging final and executory ito at ang pera ay kailangang ibalik sa kaban ng bayan.
Nagtataka ang inyong Agarang Serbisyo Lady, bakit hindi inilabas ng COA sa publiko ang kanilang findings sa loob ng sampung taon?
Bakit ngayon lang?
Maibabalik pa kaya ang halagang PHP 5.8 billion?
