MANILA, Philippines – Binisita ni Pangulong Ferdinand Marcos Jr. nitong Sabado, Setyembre 27 ang implementasyon ng Zero Balance Billing (ZBB) policy sa isang ospital sa Cagayan, kasabay ng pangunguna sa Yaman ng Kalusugan Program (YAKAP) caravan.
Unang nagtungo si Marcos sa Alfonso Ponce Enrile Memorial District Hospital (APEMDH) sa Gonzaga, kung saan sinalubong siya nina Gobernador Edgar Aglipay, Mayor Rellie Dalmaceda at hospital chief Dr. Rowena Sion.
Nakipagkita si Marcos sa mga healthcare worker at binisita ang mga pasyente sa ward section, at tiningnan kung ipinatutupad ang ZBB program.
“The President witnessed firsthand how the zero balance billing initiative is being implemented at the district hospital, which is fully supported by the provincial government. The program ensures that no out-of-pocket expenses are required for eligible patients during confinement in government hospital wards,” saad sa kalatas ng Presidential Communications Office.
Inanunsyo rin ng Pangulo ang planong pagpapalawak sa Medical Assistance for Indigent Patients (MAIP) program at pagtatayo ng specialty wards sa provincial hospitals para sa cancer, heart disease, diabetes at dialysis care.
Ang APEMDH ay isang Level 1 district hospital na mayroong 25-bed capacity.
Mahalaga ito para sa mga munisipalidad ng Gonzaga, Sta. Ana, Sta. Teresita at bahagi ng Buguey.
Tumatanggap ang ospital ng average na 210 pasyente araw-araw at sinusuportahan ng 95 medical at non-medical personnel. RNT/JGC
