Chiz pinapa-disbar si Falcis dahil sa mapanirang FB posts

MANILA, Philippines – Nagharap si Senador Francis “Chiz” Escudero ng reklamo sa Korte Suprema laban kay Atty. Jesus Nicardo Madarang Falcis III nitong Lunes, Setyembre 29.

Hinihiling ng senador ang disbarment ng abogado dahil umano sa serye ng iresponsable at mapanirang posts sa social media na malinaw na lumabag sa Code of Professional Responsibility and Accountability (CPRA) na dapat sinusunod ng lahat ng miyembro ng Philippine Bar.

Sa verified complaint, tinukoy ni Escudero ang mga post mula Hulyo hanggang Setyembre 2025 kung saan tinawag siya ni Falcis na “shameless,” “the worst Senate President in history,” at paulit-ulit na “bulok na keso.” Aniya, ang mga pahayag na ito na mapanira, mapanlait, mapoot, at malisyoso ay sapat na dahilan para tanggalin si Falcis sa talaan ng mga lisensyadong abogado.

Giit ni Escudero, bilang abogado, bigo si Falcis na sundin ang pinakamataas na pamantayan ng propesyon at nararapat sa pinakamabigat na parusa na disbarment. Aniya, kahit pa sabihin na “salita lamang” ang kanyang ginamit, ang pagiging publiko at mapanirang katangian ng mga ito ay hindi dapat palampasin.

Sa reklamo, sinabing lumabag si Falcis sa Canon II (Propriety) dahil sa kawalan ng paggalang sa kapwa abogado, at sa Canon III (Fidelity) nang maglabas ng akusasyon sa social media sa halip na sa tamang forum. Idinagdag pa na dati na siyang na-contempt ng Korte Suprema, patunay ng kanyang paulit-ulit na paglabag sa CPRA.

Ayon kay Escudero, kinikilala niya ang karapatan ng publiko na pumuna sa mga opisyal, subalit ang mga abogado ay may obligasyong magpahayag nang may dignidad at respeto. Sa halip, lumampas umano si Falcis sa hangganan at gumamit ng paninira.

Tinukoy rin sa reklamo ang mga naunang desisyon ng Korte Suprema: noong 2022, idinisbar si Atty. Berteni “Toto” Causing dahil sa pag-post ng draft plunder complaint sa Facebook, at noong 2023, tinanggalan ng lisensya si Atty. Larry Gadon dahil sa pagmumura at paggamit ng malaswang pananalita sa publiko.

Bigay-diin ni Escudero, ang mga kasong ito ay nagpapakita na hindi ganap na malaya ang mga abogado sa paggamit ng free speech, lalo na kung ang kanilang mga salita ay nakakasira sa tiwala ng publiko sa legal system. Hiniling niya ang pinakamabigat na parusa na disbarment, dahil hindi umano sapat ang suspension o reprimand para kay Falcis na dati nang napaalalahanan ng Korte Suprema.

Dagdag pa niya, ang posts sa social media ay may global reach at maaaring magamit sa iba’t ibang platforms. Kaya’t malinaw sa CPRA na tungkulin ng mga abogado na maging maingat, makatarungan, at magpakita ng paggalang bago maglabas ng salita online. RNT/NT