PINABULAANAN ni Department of National Defense (DND) Secretary Gilberto Teodoro Jr. ang “tsismis” na may namumuuong coup plot sa panig ng Armed Forces of the Philippines (AFP) laban kay Pangulong Ferdinand Marcos Jr. sa gitna ng Setyembre 21 rally.
“Walang nagbalak sa AFP. Maraming nagdadasal na may nagbalak sana pero walang nagbabalak sa AFP,” ayon kay Teodoro.
“Lahat ng organisasyon may discontent. Pero kung ang discontent na ito ay may kinalaman sa pag-aaklas, hindi ’yon. Dasal ng iba ’yon. Pero hindi mangyayari ’yon,” aniya pa rin.
Sinabi pa rin nito na sa bahagi ng DND, nananatiling “stable” ang AFP. Tugon ito sa pahayag ni Vice President Sara Duterte na ang gobyernong Marcos ay hindi na stable.
Ani Teodoro, hindi naman ang military ang problema ng bansa.
“Credibility issue ito at seryoso ang Presidente dito. So politically may political problems, hindi naman natin tinatanggi ’yun eh. So politika din ang solusyon, corruption problems, judicial ang solusyon at prosecutorial,” ang winika ng Kalihim.
Sinabi pa rin ni Teodoro na nananatiling committed ang military sa Konstitusyon at maging sa chain of command.
“It remains supportive of the Constitution, naturally. And the chain of command is very important. And it is important that they do not do roles that are not theirs to play,” anito.
“We have already had several experiences with military interventionism and I think the country has learned, should have learned its lesson,” ang pahayag ni Teodoro. (Kris Jose)
