MANILA, Philippines – Iniulat ng Department of Migrant Workers (DMW) na bumaba sa 25 ang bilang ng mga overseas Filipino workers (OFWs) na nasa death row sa ibang bansa, mula sa humigit-kumulang 50 hanggang 60 noong nakaraang taon.
Tiniyak ni DMW Secretary Hans Leo Cacdac ang patuloy na pagbibigay ng legal at diplomatikong tulong sa mga Pilipinong nahaharap sa parusang kamatayan. “Bawat OFW ay bahagi ng ating global Filipino family. Mananatili kaming kakampi nila, ipaglalaban ang kanilang karapatan, at hihingi ng katarungan at habag saan man posible,” aniya.
Ayon kay Cacdac, bunga ito ng masinsing diplomasya ng pamahalaan at ng reporma sa batas ng Malaysia, na nag-alis ng mandatory death penalty at nagbigay ng kalayaan sa mga hukom na magtakda ng sentensya. Pinapayagan din ng bagong batas ang muling pagsusuri ng mga dati nang hatol, kabilang ang sa mga Pilipinong bilanggo.
Nakikipag-ugnayan ang DMW sa Department of Foreign Affairs (DFA) at Office of the President upang matiyak ang due process, pagkakaroon ng abogadong legal, at mga pagkakataon para sa clemency o pagbabawas ng sentensya.
Dagdag pa rito, nagbibigay din ang DMW ng psychological, moral, at pinansyal na suporta sa mga pamilya ng mga apektado, at pinalalakas ang legal literacy programs upang maiwasan ang kahalintulad na mga kaso sa hinaharap. RNT
