MANILA, Philippines – Nanawagan muli ang Department of Human Settlements and Urban Development (DHSUD) sa mga private developers na makiisa sa pagsugpo ng lumalalang 2.2 milyong housing backlog sa bansa.
Ayon kay DHSUD Undersecretary Henry Yap, hindi kakayanin ng pamahalaan na tugunan mag-isa ang naturang krisis sa pabahay.
“National agencies and local government units must also identify lands for housing, actively provide housing units, and streamline their permit processes,” pahayag ni Yap sa harap ng mahigit 700 miyembro ng Chamber of Real Estate Builders Association (CREBA) sa kanilang national convention nitong Huwebes.
Hinikayat niya ang mga pribadong kumpanya na mamuhunan sa socialized housing projects para sa mga pamilyang nakatira sa high-risk areas gaya ng mga gilid ng ilog, matarik na dalisdis, at iba pang delikadong lugar.
Dagdag ni Yap, ipinapatupad ng DHSUD ang mga data-driven, climate-responsive, at sustainable housing policies, kabilang ang pagbaba ng interest rates ng Pag-IBIG Fund para sa mga benepisyaryo ng Pambansang Pabahay para sa Pilipino (4PH) program.
Binigyang-diin din ni CREBA president Noel Cariño na higit pa sa materyales ang misyon ng mga tagapagtayo ng bahay.
“Construction is the real measure of people’s dignity. It is a symbol of security, opportunity, and belongingness. That shelter is about ensuring that every Filipino family can sleep in safety and wake up with hope,” aniya.
Ang taunang convention ng CREBA ay may temang “One Voice, One Vision: Housing for All.” RNT/JGC
