Manila, Philippines – Muling binuhay ni House Speaker Faustino “Bojie” Dy III ang Statement of Assets, Liabilities, and Net Worth (SALN) Review and Compliance Committee kaugnay sa paglalabas ng SALN ng mga mambabatas.
Ayon sa speaker ang pagbuhay sa SALN Review and Compliance Committee ng Kamara ay naka-ugnay sa probisyon ng Republic Act No. 6713 at sa mga naunang pahayag nito ukol sa paglalabas nito sa publiko.
Kasabay nito ay inilabas na rin ni Dy sa publiko ang kaniyang SALN upang magsilb ing halimbawa.
Nakapaloob sa isang memorandum na may petsang October 20, 2025 na si Deputy Speaker at South Cotabato 2nd District Rep. Ferdinand L. Hernandez ang inilagay na Chairperson ng nasabing komite kasama sina Iloilo 3rd District Rep. Lorenz R. Defensor at Marikina 2nd District Rep. Romero Federico S. Quimbo na bilang Vice Chairpersons.
Magiging miembro naman sina TGP Party-list Rep. Jose “Bong” J. Teves Jr., Tarlac 2nd District Rep. Maria Cristina C. Angeles, Quezon 1st District Rep. Wilfrido Mark M. Enverga, Ilocos Norte 2nd District Rep. Angelo M. Barba, at Dinagat Islands Lone District Rep. Arlene J. Bag-ao.
Ang technical at administrative support ay kabibilangan ng mga senior officials mula sa Legal Affairs, Legislative Operations, at Administrative Departments, Office of the Secretary General, Committee on Rules, at ang Records Management Service kasama ang tanggapan ng Speaker.
Ang memo na ipatutupad sa lalong madaling panahon “ will continue to perform its mandate as contained in House Memorandum Order No. 17-42 (SPK) dated December 20, 2016, and in the Rules of Procedure in the Filing, Review, and Disclosure of, and Access to, the SALNs of Members, Officials, and Employees of the House of Representatives under Resolution No. 176 adopted on January 30, 2019.”
Ang pagbuhay sa SALN Committee ay kasunod ng nagisng pahayag ni Dy na handa ang liderato ng Kamara na repasuhin ang panuntunan sa paglalabas ng SALN sa publiko upang matiyak ang transparency at accountability.
Idinagdag pa ni Dy na ang SALN ng mga mambabatas ay dati ng nailalabas sa publiko kung kaya marapat lamang aniya na ito ay buhayin ng kasaluukuyang liderato.
“Noong panahon natin, open naman para makita ng publiko ‘yung ating SALN. Kung kinakailangan, syempre, lead by example tayo.” (Meliza Maluntag)
