MANILA, Philippines – Minomonitor ng National Capital Regional Police Office (NCRPO) ang mga posibleng anti-corruption rally kasabay ng paggunita ng Undas.
Nauna nang sinabi ng Philippine National Police (PNP) na magpapakalat ito ng mahigit 31,000 na tauhan para magbigay seguridad sa inaasahang dagsa ng mga biyahero.
“We can’t ever discount the possibility that protesters will take this opportunity to gather. That’s why part of our preparations is our deployment,” pahayag ni NCRPO Public Information Office chief Maj. Hazel Asilo.
“Our RSSF (Reserve Standby Support Force) is ready to be deployed in case there would be lightning rallies or protesters from different locations here in NCR,” dagdag pa niya at sinabing mayroon pang 600 tauhan mula sa regional unit ang inihahanda para ipakalat.
Ang tuloy-tuloy na mga rally mula noong Setyembre 21 ay bilang protesta sa mga anomalya sa flood control projects.
Dagdag pa, inanunsyo ng Trillion Peso March movement na magdaraos sila ng mga kilos-protesta tuwing Biyernes bago ang inaasahang malaking demonstrasyon sa Nobyembre 30.
Naka-alerto naman ang PNP sa lingguhang kilos-protesta. RNT/JGC
