MANILA, Philippines – Nanawagan si Senate Deputy Majority Leader Joseph Victor “JV” Ejercito sa mga ahensya ng gobyerno na agad na tugunan ang “dangerous disconnect” sa pamamahala ng yamang tubig.
Sinabi ni Ejercito na ang kawalan ng koordinasyon sa pagitan ng mga flood control projects at mga ahensyang may teknikal na kadalubhasaan sa river basis at water systems ay nakasisira.
Nagbabala ang senador na ang mahinang koordinasyon ng mga ahensya ay maaaring makasira sa kapasidad ng bansa na pamahalaan ang suplay ng tubig nito.
Bukod dito, maraming proyekto sa imprastraktura ang pangunahing nakatuon sa paglilipat ng tubig sa dagat, sa halip na itago o muling gamitin ito para sa mga tuyong buwan.
Nagbabala rin siya na kung walang koordinasyon at pagpaplanong nakabatay sa agham, magpapatuloy ang mga maanomalyang proyekto habang ang mga pagpapasya ay ipinauubaya sa indibidwal na pagpapasya sa halip na teknikal na patnubay.
Sa pamamagitan nito, muling itinulak ni Ejercito ang paglikha ng panukalang Department of Water Resources Management na magsusulong ng mas magkakaugnay at napapanatiling diskarte sa parehong konserbasyon ng tubig at pagkontrol sa baha.
Ang iminungkahing ahensya ng tubig ay tutulong din sa pagsugpo sa paglitaw ng mga maanomalyang proyekto sa imprastraktura ng tubig. RNT/MND
