MANILA, Philippines – Magandang panahon ang mararanasan ngayong All Saints’ Day at All Souls’ Day sa karamihang bahagi ng bansa kahit na mayroong iba’t-ibang weather system, sabi ng weather bureau.
Ang weather update ng Philippine Atmospheric, Geophysical and Astronomical Services Administration (Pagasa) Biyernes ng hapon ay nagpakita na ang intertropical convergence zone (ITCZ) ay nakakaapekto pa rin sa mga lalawigan sa katimugan, habang ang northeast monsoon o amihan, kasama ang shear line, ay nagdadala ng maulap na panahon sa hilagang mga lalawigan.
Gayunpaman, maaari pa ring makaranas ng pag-ulan sa hapon o sa gabi.
Binabantayan pa rin ng Pagasa ang ITCZ, ngunit walang inaasahang pagbuhos ng malakas na ulan sa mga lugar na apektado ng convergence ng hangin mula sa northern at southern hemispheres.
Dalawang low-pressure area (LPA) naman ang namonitor sa kahabaan ng ITCZ — ang isa ay nasa 1,595 kilometro silangan ng Northeastern Mindanao, at ang pangalawa sa 160 kilometro kanluran-timog-kanluran ng Coron, Palawan. Ang LPA sa kanluran ng Palawan ay hindi inaasahang magiging isang tropical cyclone, ngunit ang isa pang LPA sa silangan ng Mindanao ay may katamtamang posibilidad na maging isang tropical depression.
Sinabi ng Pagasa na ang LPA sa silangan ng Mindanao ay maaaring pumasok sa Philippine area of responsibility (PAR) sa Linggo ng gabi o Lunes ng umaga, at maaaring maging ika-20 tropical cyclone sa loob ng PAR para sa taon ng kalendaryo. Tinatayang tatawid ito sa Visayas at Southern Luzon area, ngunit nilinaw ng Pagasa na maaari pa rin itong lumihis sa kasalukuyang predicted track.
Ang isa pang LPA ay inaasahang mabubuo sa pagitan ng Nobyembre 6 at Nobyembre 12, na nagmumula rin sa Karagatang Pasipiko.
Walang itinaas na gale warning, ngunit sinabi ng Pagasa na magiging moderate to rough ang lagay ng dagat sa extreme northern Luzon seaboard, na may posibleng taas ng alon na 1.5 meters hanggang 2.8 meters. RNT/MND
