MANILA, Philippines – Nanawagan ang Makabayan bloc na imbestigahan sina Executive Secretary Lucas Bersamin at Budget Secretary Amenah Pangandaman dahil sa umano’y kaugnayan nila sa kontrobersyal na budget insertions sa 2025.
Ang panawagan ay kasunod ng alegasyon ni dating Ako Bicol party-list Rep. Elizaldy Co, na nagsabing hiningi ni Pangulo Marcos ang P100 bilyong insertions, na umano’y nagresulta sa P25 bilyong kickbacks.
Ayon sa Makabayan, hindi sapat ang pagbibitiw ng dalawa, na tinanggap ng Malacañang bilang kilos ng “delicadeza.”
“They and their associates must be investigated and prosecuted to the full extent of the law,” anila.
Idinagdag nila na dapat din isama sa imbestigasyon si Pangulo Marcos.
“If his executive secretary is deeply involved in corruption, how can the President claim ignorance? The executive secretary is the alter ego of the president — his involvement necessarily implicates Marcos Jr.,” pahayag ng grupo.
Binanggit din ng Makabayan ang iba pang opisyal na dapat suriin, kabilang sina Presidential Legislative Liaison Office Undersecretary Adrian Bersamin, Education Undersecretary Trygve Olaivar, at Justice Undersecretary Jose Cadiz Jr.
Binigyang-diin ng grupo na dapat maabot ng katarungan ang pinakamataas na antas ng pamahalaan, at nanawagan sa Kongreso, Ombudsman, at mga ahensiya ng batas na kumilos “without fear or favor.” RNT
