Iligal na pagawaan ng paputok sa Pangasinan, sumabog na parang bulkan

MANILA, Philippines – Sumabog ang isang ilegal na pagawaan ng paputok nitong Linggo ng hapon sa Barangay Tebeng, Dagupan City, Pangasinan, na nagdulot ng pagkasugat ng lima katao at pinsala sa mga kalapit na bahay.

Inilarawan ng mga residente ang pagsabog na “parang bulkan”  na nagpasabog ng mga bintana.

Ayon kay Dagupan City Fire Marshal Jun Eland Wanawan, apat na bahay ang nagtamo ng pinsala, karamihan mula sa lakas ng pagsabog.

Sinabi naman ni Police Colonel Orly Pagaduan na nagti-testing ang mga tauhan ng paputok nang walang tamang safety equipment sa isang bukas na istruktura.

Walang permit at ilegal ang operasyon ng pagawaan.

Sa limang sugatan, isa ang malubha ang kalagayan. Ipinahayag ng mga residente na hindi nila alam ang pagkakaroon ng pagawaan, dahil karamihan ng nakatira sa compound ay boarder.

Binigyang-diin ng mga awtoridad na ang mga pagawaan ng paputok ay dapat ilayo sa mga bahay.

Patuloy ang imbestigasyon, at sinusubukan makontak ang may-ari ng pagawaan. RNT