MANILA, Philippines – Itinanggi ni dating Executive Secretary Lucas Bersamin nitong Miyerkules, Nobyembre 19 na siya ay may kaugnayan sa insertion sa national budget para sa fiscal year 2025.
Ang pagtanggi ni Bersamin ay kasunod ng sinabi ni Senate President Pro Tempore Panfilo “Ping” Lacson na si Bersamin ang bahala sa P52 bilyong insertions sa budget.
Tinutukoy ni Lacson ang impormasyon mula kay dating Department of Public Works and Highways Undersecretary (DPWH) Roberto Bernardo.
“I vehemently deny the imputation against me that I said anything to Sec. (Manny) Bonoan that ‘we will take care of it’ regarding the supposed facilitation of the ?52 billion,” sinabi ni Bersamin.
“Bernardo could not be a credible source of relevant information if his knowledge looks and sounds like at least triple hearsay,” dagdag pa niya.
Nitong Martes, Nobyembre 18, tinukoy ni Lacson ang dalawang government undersecretaries na gumamit umano ng pangalan ni Pangulong Ferdinand Marcos Jr. na kumuha ng kickback ng P52 bilyon mula sa umano’y fund insertions sa 2025 national budget.
Tinukoy ni Lacson ang mga ito na sina dating Department of Education (DepEd) Undersecretary Trygve Olaivar at Presidential Legislative Liaison Office (PLLO) Undersecretary Adrian Bersamin.
“Sinabihan siya ni Usec. Trygve Olaivar na si Secretary Bonoan asked Executive Secretary Bersamin several times. Sino ba mag fafacilitate nitong P52 billion? Of course, isasama sa bicam, paano ito rerelease? Sino mag fafacilitate? Ang sagot ni ES Bersamin sakanya, ‘We will take care of it.’ Sila na daw bahala,” ani Lacson.
Matatandaan na boluntaryong nagbitiw sa pwesto si Bersamin matapos maugnay ang pangalan sa flood control projects scandal.
Ani Palace Press Officer Undersecretary Atty. Claire Castro, si Bersamin ay bumaba dahil sa delicadeza, kasama ni dating Budget Secretary Amenah Pangandaman.
Ang kanilang pagbibitiw ay magbibigay-daan sa administrasyon na imbestigahan nang maayos ang kontrobersiya. RNT/JGC
