MANILA, Philippines — Kinumpirma ni Ombudsman Jesus Crispin Remulla na kasalukuyang iniimbestigahan si dating House Senior Deputy Speaker Aurelio “Dong” Gonzales Jr. dahil sa umano’y kontrobersiya sa flood control projects.
Si Gonzales ay inakusahan bilang “congtractor,” tawag sa mga kongresistang nagmamay-ari o namamahala ng construction company na nakakakuha ng kontrata mula sa gobyerno.
“Congtractor yan eh… People didn’t believe that there would be accountability whatsoever in violating the law, harap-harapan kasi nga walang manghuhuli. Bawal iyan eh. It’s a prohibited activity, it’s a conflict of interest found in so many laws on corruption so mahirap na makatakas diyan,” ani Remulla.
Ayon sa Ombudsman, may siyam pang iba pang politiko na iniimbestigahan para sa katulad na conflict of interest.
“Isa-isa yan. Kailangan hihimayin mo kasi maraming magaling magtago e… yung unahin natin, tinatawag ngang low-hanging fruit,” dagdag pa niya.
Sinabi ni Gonzales na bukas siya sa anumang imbestigasyon, ngunit aniya, ang kaso laban sa kanya noong 2023 ay isinara.
“While I welcome any inquiry on the matter, I am not aware of an ongoing Ombudsman formal investigation against me on prohibited interests… It appears to be a rehashed and recycled subject, if any,” ayon kay Gonzales. Santi Celario
