Gloc-9, Sponge Cola pinasigla ang pagpapailaw sa Gapan City Plaza

MANILA, Philippines – Hindi mahulugang karayom ang mga taong sumaksi sa pagpapailaw sa plaza ng Gapan City, Nueva Ecija nitong Sabado ng gabi.

Bago binuksan ang mga naggagandahang ilaw, binasbasan muna ang life size belen na kapanganakan ng Panginoong Hesukristo na sumisimbolo sa Kapaskuhan.

“Huwag nating kalilimutan na ang selebrasyong ito ay hindi lang basta kantahan at may bonggang ilaw, ito ay pagpapaalala po sa atin ng kapanganakan ng Panginoong Hesus Ipagpasalamat po natin sa Panginoon kung bakit tayo naririto po ngayon.Sana po ‘wag nating kalilimutan ‘yan,” ayon kay Mayor Emary Joy Pascual ng Gapan City.

“Nandito na naman po tayo sa tradisyon natin na pailaw o lighting ceremony ng Christmas Festival sa Lungsod ng Gapan. Napakaswerte po natin dahil sa Mayor Joy ay ipinagpatuloy at hinigitan ang dati na nating ginagawa. Tuloy-tuloy lang po ang ating dekalibreng serbisyo,” Sabi naman ni Rep. Emerson “Emeng” Pascual, 4th district Nueva Ecija.

Sabay sabay na nag-count down ang mga dumalo at nagliwanag ang buong paligid ng Gapan City plaza dahil sa 131 feet giant Christmas tree, giant ferris wheel at napakahabang Christmas tunnel sa kalsada patungo sa lumang Gapan kung saan makikita ang mga sinaunang kabahayaan at antigong mga kagamitan.

Lalong sumigla ang okasyon sa performance na Gloc 9 at iba pang mga sikat na banda, tulad ng Sponge Cola na talaga namang pinagkaguluhan ng mga batang Gapan.

Bukod sa naggagandahang mga pailaw, may mga pagkain din na pwedeng mabili sa kanilang night market, fast food chain at mga restaurant na bukas hangggang alas: 10:00 ng gabi.

Nagpasalamat ang lokal na pamahalaan sa mga tumulong at nagbigay suporta para maisakatuparan ang Pailaw sa Gapan 2025. MARINA BERNARDINO-SY